Topographia Braunschweig Lüneburg: Gandersheim Ampt
_127.jpg){kind=link}
Das Ampt Gandersheim ist ein altes / zum Fürstenthumb Braunschweig Wulffenbüttelschen theiles / mit aller Hoch- vnd Bottmässigkeit / gehöriges Ampt / das jetzige Schloß aber ist bey Regierung Hertzog Heinrichs deß Jüngern / Hertzogens zu Braunschweig vnd Lüneburg / zu einem Fürstlichen Residentz-Hause in anno 1530. zu bawen angefangen / vnd bey Hertzogs Julii hoch Christmilder Gedächtnuß Regierung / perfectiret / vnd gantz außgebawet worden.
Das Hauß ist von grund an / biß oben auß / von lauter Steinen / auff Italianische Manier gebawet / vnd mit blawen Schieffersteinen gedecket / auch sonst zu einer Fürstlichen Hoffhaltung recht aptirt / hat gegen Auffgang der Sonnen den Hartzwald / grentzet daselbst mit dem Ampt Bilderlah vnd Seesen / gegen Niedergang mit dem Ampt Grehne / woselbst der Leinafluß dieses von jenem scheidet / gegen Mittag grentzet es mit dem Ampt Westerhofe / vnd gegen Mitternacht mit dem Ampt Wintzenburg.
Gandersheim hat vermuhtlich den Nahmen von der Gande / einem kleinen Flusse / welcher gegen Nord Ost entspringet / vnd fleusset allernechst dem Ampthause vorbey / treibet vnterwerts dem Ampt eine Mühle / mit 5. oberschlechtigen Mahlglinden / fället gegen Abend in die Leina.
Das Ampthauß ist in den vorgewesenen Kriegs-troublen / vnd vielmahligen Einquartierungen sehr ruiniret / aber diese nechste Jahre / durch gnädige Verordnung deß Landesfürsten / zimlich wieder repariret vnd außgebessert.
Beym Ampte allernechst / ligt das berühmte Keyserl. Freye Weltliche Stifft / auch die Statt Gandersheim / vnd sind Ampt / Stifft vnd Statt bey einander in einem Thale gelegen / vff allen seiten mit Bergen vmbgeben. In der Statt Gandersheim ist vor Jahren ein Gymnasium gewesen / aber wegen deß sumpfigen Orts / vnd daß die Wassere sich zum offtern ergiessen / vnd von den herumbligenden Bergen in das Thal vff die Statt stürtzen / auch auß anderen wichtigen Vrsachen / ist bey Hertzog Julii Zeiten das Gymnasium nacher Helmstatt transferiret / vnd in eine Vniversität verändert worden.
Dieser Ort / so wol Ampt / als Statt / weil er nicht sonderlich veste / vnd nur mit einer Maur vmbzogen / ist in dem Kriegswesen zum offtern außgeplündert / auch dergestalt mitgenommen / daß in der Statt gantze Gassen vnbebawet wüste ligen.
In dieses Amptes territorio sind / nebst vorerwehntem Keyserl. Stifft / auch zwey Clöster gelegen / als Closter Clauß / vnd Closter Brunshausen / das Ampt hat 20. Dörffer / benantlich Danckelßen / Gehrenrohda / Helmscherohda / Alten Gandersheim / Grembsen / Ackenhausen / Wolperohda / Dannenhausen / Hochemhausen / Sebbelshausen / Wressirohda / Opperhausen / Rittirohda / Olxen / Hoyershausen / Billerbeck / Kreyensen / Beulshausen / Heckenbeck / vnd Orxhausen. Bey vnd vor diesen Dörffern ist zimblicher Ackerbaw / trägt allerhand Kornfrüchte / an Weitzen / Rogken / Gersten / Habern / Bohnen / Erbsen / Wicken vnd Linsen: Hat keine grosse Wasserströme / sondern nur Bäche / der fürnehmste ist die Gande / wovon Ampt / Stifft vnd Statt den Nahmen haben.
Das Ampt mit seiner Bottmässigkeit begreiffet in der Circumferentz bey die zwo Meil weges / vnd ligt das Ampt in der mitte / vnd die obbemeldte Dörffer rings herumb zu allen seiten.