Topographia Braunschweig Lüneburg: Hessem

Hessem.

Ist ein vornehmes Fürstl. Braunschweigisches Wolffenbüttelisches Schloß vnd Ampthauß / drey Meile von der Residentz vnd Haupt-Vestung Wolffenbüttel / auff dem Wege nach Halberstatt / hinter dem Hessendam gelegen. Es ist dieses Hauß von Hertzog Heinrich Julio zu Braunschweig vnd Lüneburg / etc. Christmilder Andenckens / ansehnlich verbessert / vnd zu einem Fürstlichen Hofflager mit grossem Vnkosten aptirt worden: Inmassen dann ein solches noch heutiges Tages der Augenschein bezeuget. Es ist auch von Sr. Fürstl. Gn. ein sehr berühmter Lustgarte angeordnet worden / welcher schöner kostbarer grosser Garte wol zu sehen / ist auch davon ein eigen Tractat von dem Lustgärtner / M. Johann Röiern / in offentlichen Truck außgangen / vnd darin mit mehrem beschrieben worden. In diesem Lustgarten sind vnter anderm drey schöne Kunstbrunnen / von Spritzkünsten zugerichtet / vnd ist der eine Kunstbrunnen von den Kauffleuten zu Augs- vnd Regenspurg / vmb vnd vor 8000. gute Gülden erhandelt worden.

Es liget dieser Lustgarte fein mitten in der Ebne / an dem Fürstl. Hause / an einer seiten gegen dem Mittag hat das Fürstl. Hauß Hessem ein schön Gehöltz / der Falstein genant / an der andern seiten hero gehet ein Wasser / die Jere genant / kommet von dem Hause Zylli her / vnd gehet an dem Hessendamb / an der einen seiten hernieder / biß an den letzten Braunschweigischen Zoll.

Das Dorff vnd Flecken Hessen / so bey dem Fürstl. Hause liget / vnd dazu gehöret / ist bey Zeiten Marggraff Albrechts von Brandenburg gantz in die Aschen geleget; gleichfalls ist von den Schwedischen Völckern / Anno 1641. dasselbe auch gantz außspolirt / vnd hernach über die helffte in den Brand gesetzet worden.

Sonsten gehet durch hiesiges Dorff-Flecken die Leipziger / Braunschweiger / Hamburger vnd Bremer Heerstrasse / vnd müssen die Fuhrleute allemahl / in der hin vnd her Reise / über den Hessendamm ihre Fahrt nehmen.