Topographia Colonia et al.: Lohnstein

Lohnstein / oder Ober-Lonstein / ist ein Chur-Mäyntzisch Ober-Ampt / allda die Lohn in den Rhein fället / ein lustiges Stättlein / in einer Ebene / zwischen Boppart / Braubach / vnnd Coblentz / gelegen / ein vierthel Stund darunter / ligt das Dorff Nider-Lohnstein. Der Fluß / davon diese beyde Oerter den Nahmen / wird eygentlich Logana, vnd vnrecht Lanus genant / wie Freherus part. 2. Origin. Palat. cap. 5. pag. 18. erinnert / so diesen Ort von der Lone / Lonstein nennet / allda das Schloß Lancke seye / also genannt / daß es auff einem Eck- vnd fürreichenden Berg gelegen / vnd auff die besagte Lohne / herab sehe. Wiewol in Auson. Mosel. er Freher. fol. 109. solches Stättlein auch Lahnstein / vnd den Fluß Loganum, das Gäw aber Pagum Loganensem nennet / so vor Zeiten Loganehe / Lohngowe / Logenehe / vnd Logengowe / geheissen hat. Trithemius in gestis Friderici Palatini sagt / pag. 33. daß dieses Lanstein vom Ertzbischoff Johanne von Trier / in dem Krieg / den die beyde Ertzbischöffe Dieterus, vnnd Adolphus zu Mäyntz / wider einander geführet / zweymal vergebens belägert worden seye; dieweil es die Bürger mit gedachtem Diethero gehalten haben. Vnd sagt er am folgenden Blat / daß dieses Lonstein auch / auff erfolgten Vergleich / ihme Diethero, blieben seye / sampt dem Schloß / vnd dem Zoll. Es hat allhie ein Bad / so dem Magen / fürs Blut außwerffen / vnd vbrig Schwitzen dienet / wie Johann Göbel / in Beschreibung der Bäder / am 96. Blat zu lesen. Obgedachter Freherus in notis ad Petr. de Andlo cap. 2. pag. 166. schreibet: Es seye allhie Keyser Wenceslaus, von den Churfürsten deß Reichs entsetzt / vnnd Rupertus Pfaltzgraff / vnd Churfürst / zum Keyser erwöhlet worden. Es gibt allhie ein schönen Prospect / also / daß man in einem Gesicht / vier Stätt vnd drey Schlösser siehet: Als Lohnstein / Capell / Rens / vnd Braubach.