Topographia Saxoniae Inferioris:Steuerwald

Steuerwald /

Ein Schloß im Stifft Hildesheim / vnd noch zu demselben gehörig / so der 33. Bischoff Sigefridus II. wider die von Hildesheim / gebawet / vnd für ihre Statt Anno 1312. gelegt / weil Sie Ihme widerspenstig / aber belagert / vnd mit Gewalt zum Gehorsam bezwungen worden / daß Er / durch dieses Schloß / ihrer Gewalt desto leichtlicher steuren / vnd begegnen möchte. Daher auch der Nahm / gleichsam Steuer-Gewalt dem SchLosse geben worden ist. Andere schreiben / die Erbawung desselben / seinem Sucessori Henrico zu. Die von Hildeßheim seyn zwar hernach / vnter dem 36. Bischoff / so Anno 1362.gestorben / außgefallen / vnd diesem Schloß mit stürmen / vnd schiessen / grossen Schaden zugefügt; haben aber solchen hernach / dem Bischoff / theuer genug bezahlen müssen. In dem Hildesheimischen Krieg deß Jahrs 1521. vnd 22. kam der 46. Bischoff Johannes / fast vmb sein gantzes Land / vnd liessen Ihme die Hertzogen von Braunschweig nur 3. Schlösser / namblich dieses Steuerwald / nahend Hildesheim / am Wasser Innerste / gelegen / Marienburg / vnd Peyne / zusampt der Statt Hildesheim / vnd dem abgebranten Stättlein Peyne / vnd was in solche Vogteyen gehöret hat; so folgends den Bischoffen zu Hildesheim geblieben / vnd das kleine Stifft genant; wie hievon / auch anderswo / gesagt worden ist. Anno 1626. ward Steuerwald / von den Dänischen / mit Accord / erobert; so / noch in diesem Jahr / auch den Keyserischen zu theil worden: Aber Anno 1632. bekamen diesen Ort die Lüneburgischen / vnd Hessischen / nach dem Sie Ihn zuvor belagert hatten.