Topographia Sueviae: Embs
Der Zeit ein Gräflich HohenEmbsischer Marcktfleck / dahin An. 1647. die Schweden auch kommen seyn. Hat eine Truckery: Vnd ist die Beschreibung dieses Orts / vnd der Gelegenheit herumb / in vnserem vorhin getruckten Text / bey Veldkirch / einkommen. Darzu / wer Lust hat / einer deß Joh. Georg Schlehen / allhie Anno 1616. in fol. gedruckte Beschreibung der Landschafft vnderhalb S. Lucis Steig / vnd der Schallberg thun kan: Der vnder andern / am 40. Blat / von den Tugenden deß im besagten Text gedachten VnderEmsischen Schwefelbrunnens handelt / auch sagt: Daß Herr Graf Caspar von HohenEmbs / zu denen zuvor gehabten Grafschafften Embs vnd Gallara / (oder Gallerate / ) die Graffschafft Vadutz / vnd Herrschafft Schellenberg / Anno 1613. vmb 200. tausendt Gülden / von Carl Ludwigen von Sultz erkaufft habe: Item / daß Herr Marx Sittich von Embs / so Anno 1513. Vogt zu Bregentz / vnd Obrister Hauptmann der 4. Herrschafften vorm Arlberg / gewesen / für sich / seine Erben / vnnd Vnderthanen / die Freyheit erlangt / für kein Land: oder frembd Gericht geladen zu werden: Item / daß das veste Schloß Alt hohen Embs einen köstlichen reichen Brunnen / so auß dem Felsen herauß springe / vnd solcher etwas wunderbars an sich habe. Dann wann solch Wasser zu wäschen / oder SudelArbeit gebrauchet werde / so erseich es / vnd bleibe 14. Tag auß / so sonsten bey keiner Trückne / oder anderer Zeit / geschehe. Item / daß es vber Embs folgende Flecken habe / als / Ebnit / vnder vnd Ober-Reutin / zum Klien / Pagolten / Beltzreütin / der Berg / Schwebel / am Rhein / vnd zum Bauren. Es geben die Herrn Graffen von HohenEmbs / so viel die Grafschafft dieses Nahmens betrifft / Monatlich einfach vier vnnd zwantzig Gulden / was sie wegen Vadutz / vnnd Schellenberg zu geben / das kompt anderswo ein. Was Ihre Gn. Gn. zu Vnderhaltung deß Cammer Gerichts zu geben / hat Doctor Beckers nicht: Will sich auch sonst nicht finden lassen.