Topographia Superioris Saxoniae: Dessau

Dessau.

Ein fürstliche Anhaltische Hoffstatt an der Elb / vier Meylen vnderhalb Wittenberg / gelegen. Theils wollen / daß die Juden / so etwan hierumb gewohnet / dieser Statt / von der Feiste / oder Schmaltz / das ist / von der Fruchtbarkeit deß Bodens / solchen Nahmen gegeben Iohannes Matthesius, sagt: in der 16. Predigt von D. Luthern / am 185. Blat / also: wie wenn Desse sein Nahmen auch von der Fettigkeit hette / daß GOTT dahin grosse Fürsten / vnnd Herren / verordnen würde / die von ihrer Fettigkeit / vnnd Brüsten / die Kirche GOttes / vnnd ihre Diener / seugen / ernehren / vnnd reichlich vnderhalten würden / etc. Abraham Sauer / in seinem Theatro Urbium, schreibet p. 306. daß anfänglich ein Schloß / von den Herren Alberto, vnd Woldemaro, Gebrüdern / Fürsten von Anhalt / Anno 1341. wie eine Schrifft vber dem Thor außweise / allhie gebawet worden seye. Iohannes Micraelius part. 1. Pomeran. p. 338. berichtet / daß / zu Dessau / der Jeckel Rehebock / den theils Meniken von Belitz nennen / ein alter Müller zum Hundlufft / der sich für den verstorbnen Marggraff Waldemar zu Brandeburg (dessen Schildknabe er / in seiner Jugend / gewesen / auch ihme nicht gar vngleich gesehen) außgegeben / vnd viel Leuthe verführt / Anno 1350. gestorben / allda in einer Capell begraben / vnd ein Spiegel der Menschlichen Eytelkeit worden seye. Daß vmbs Jahr 1641. Herr Johann Casimir / Fürst zu Anhalt / etc. allhie seyn Hofflager gehabt / ist oben im Eingang / vnd Beschreibung deß Fürstenthumbs Anhalt / Meldung geschehen. Es ist nahend bey der Statt ein stattliche Bruck vber die Elb vorhin gewesen / welche die Keyserischen / eben an dem Tag / da Magdeburg von dem Generaln vnnd Graven von Tilly erobert worden / nemblich den 10. 20. Maij Anno 1631. selbsten / sampt der Schantz / auß Forcht vor den Schweden / mit Fewer gantz zernichtet / welches sie hernach / wie man geschrieben / gerewet haben solle. Etliche Jahr zuvor / ist Graf Ernst von Manßfeld / bey dieser Brucke / von den Keyserischen geschlagen worden: vnd hat auch sonsten dieselbe / in dem nächsten Teutschen Krieg / sich wol bekant gemacht: wie dann auch die Statt sich selbsten / etliche Jahr lang / viel erlitten / vnd außgestanden hat. Anno 1639. den 22. Augusti / seyn die zu Hall gelegne Schwedischen hieher kommen / vnd haben allda 2. Schiff / so von Dreßden nach Magdeburg gewolt / gäntzlich außgeplündert / viel baar Geld / vnnd andere gute Beuthen darauff gemacht / mit welchen sie vnverhindert zu ruck gangen: wie in dem 4. Theil deß Theatri Europaei fol. 112. stehet.