Henneberg vor der Statt / grossen Schaden gethan: Item Anno 1355. sich sehr viel Storcken allhie versamblet / vff einer grossen Wiesen ihrer drey zu Todt gestochen / vnd solche 3. erbissene Storcken mit sich in die Statt gebracht haben. Anno 1632. ward Creutzberg von den Pappenheimischen gantz außgeplündert.
Ein Stättlein in dem Pleißner Lande / 2. grosser Meylen von Altenburg / vnnd 2. von Werdaw / oder vielmehr Wertha / vnd zwischen diesen beeden Stätten / dem Voigtland zu / vnnd an dem Wasser Pleisse / gelegen / vnnd in die Superintendentz Zwickau / mit der Weltlichen Obrigkeit aber zu dem Schloß Schweinsburg / so vngefehr ein halbe Meyl davon liegt / vnd der Zeit dem Obrist Dauben / vielleicht als ein Pfand-Schilling von Chur-Sachsen / gehörig. Boregk / in der Böhmischen Chronic meldet / pag. 449. daß die Hussiten vmbs Jahr 1430. Schmöln / vnnd Crimitsch / die Stättlein in Meissen / angezündet haben. Also hat der Schwedisch Feldmarschall Johann Banner / als er wider den General Marazins gezogen / dieses Stättlein mehr als halb abgebrandt. Vmb den Mayen deß Jahrs 1644. lagen die Keyserischen Gallasischen allhie. Hatte / vor dem jetzigen Krieg / seine Vorstätte.
Ein Chur-Sächsisch Stättlein / im Meißnischen Crayse / zwischen Wurtzen / vnd Oschitz / gelegen / so der Zeit abgebrant liegen soll.
Wird vnder die Aempter / vnnd Stätte / als Güterbock / Querfurt / vnnd Burck / oder Borck / gesetzt / welche Anno 1635. vermög deß Pragerischen Frieden-Schlusses / vom Ertzstifft Magdeburg / erblich an Chur-Sachsen kommen; vnd Ihrer Churfürst. Gn. auch / in den jetzigen General-Friedens-Tractaten / bestättiget worden seyn. Ioha. Pomarius schreibet / daß / vnder dem 38. Ertzbischoff Gunthero, der An. 1444. gestorben / das Land zur Dame / Anno 1405. dem Stifft Magdeburg anheimbs gefallen seye.
Diese im Osterland / so ein theil von Meissen / vnd in dem Leipzigischen Creysse / 3. Meylen von Leipzig / vnnd 6. kleine Meyl von Wittenberg / in der Gegend vmb Bitterfeld / vnd 3. Meylen von Hall in Sachsen / gelegene Statt / soll auff Teutsch so viel / als heiliger Grund heissen. Ist nicht groß / aber vor dem jetzigen Krieg fein erbawt gewesen / allda man gute Strümpff gemacht / so weit verführet worden seyn. Das Bier / so man da bräwet / wird der Küheschwantz genant. Anno 1429. haben die Hussiten diesen Ort außgebrannt. Besiehe das Theatrum Peccensteinij part. 3. fol. 136 In dem jetzigen Krieg ist sie vmb jhre Vorstätte kommen. Anno 1637. als Baner vor Leipzig vnverrichter Sachen abgezogen / den 7. Februar. so seynd in die 2. tausend zu Roß Schwedische nach Delitsch gangen / vnd
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 87. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_087.jpg&oldid=- (Version vom 1.8.2018)
_087.jpg&oldid=-){kind=link}
_087.jpg&oldid=3393418){kind=link}