Schachzabel Spiel

Schachzabel Spiel.

DEß Ritterlichen / ku^onstlichen Schachtzabel Spiels vnderweysung / ercla^erung / vnd verstant / wo here das kommen / were das am ersten erfu^onden / vnnd auß was vrsach es erdacht sey / Auch wie man das ku^onstlich lernen ziehen vnd spielen solle / sampt etlichen ku^onstlichen geteylten spielen etc.

     Zu^o dem Schachtzieher.
Dein augen scherpff / nicht überseh
Deim wyderteyl / fleyßlich nach speh /
Wie sich gebürt / im Feld vnd Heer /
Dein volck das schick du zu^o der weer /
Vnd orden das recht an den streyt /
Ders übersicht / gernn vnden leyt.

Getru^ockt zu^o Oppenheym.

Jacob Köbel Statschreiber zu^o Oppenheym / wünscht allen Schachtzyehernn frydliche züg / spielen / vnnd raube / scharpff auffsehens in jrem schachziehen / Vnnd verbeüt jnen zo^ernen vnnd vngestümigkeit / mit erlangung sygks / vnnd hie zeytlich / vnd dort ewige seligkeit zu^o verdienen.

DIe Scharpffsinnigkeit der gelerten Poeten / haben etwan die Reich / das leben / die überwindungen / vnd sygk der Großmechtigen Fürsten beschrieben / auß dem erkant jr lob / gu^ot / vnd ere / derenhalb jre nammen noch leben / vnnd in gedechtnüß behalten worden seind. Das hat mich Jacob Ko^ebelnn etc. ermant vnnd bewegt zu^o offenbaren die beschreibung desß Ritterlichen Schachtzabels Spiels / von dem hochgelerten Doctor Jacob Mennel / weylant in Rheymen zu^o Costentz an tag bracht / widerumb inn den Truck zu^o fertigen / Vnd vor dieselben Reymen eyn cleynen ingangk / zu^o lernung deß Schachtzabel Spiels / den jungen angenden Schachziehernn zu^o leichterm verstandt vnd bericht deß inhalts der Reimen Trucken lassen /dweil vilnn menschen die gereympte schrifft nit alß bequem zu^o versteen ist alß die vngereympt. Damit seyt got beuolhen / der eisch allezeyt nach seim go^etlichen willen in gesu^ontheit behalt etc.

Hiernach volgt das Register diß büchlins.

Register diß Büchlins.

VOn form vnd gestalt desß Schachtzabel Brets. An diesem Blat a ij. Von form / gestalt / farb / vnd namen der bild oder steyn die in das Schachbret gehoeren / etc. a ij. vnd am blat	I.
Wie man die stein inß Schahbrett stellen solle.	I
Wie eyn ygklicher stein / vnd wie ferr er vßgeen solle	II
Wie man im Schachbrett zyehen solle.	III
Nuon volgen Doctor Mennels Tittel inn seinen nachgetruockten gereympten Büchlin begriffen vnd erclaert.

VOrred inn Schachzabel. IIII

Eyns yden guoten anfägk / recht fundament / ist gott. Bey welch Künigks zeytten das Spiel erdacht sey.	V
In welchem Landt / vnd wer das spiel / vnd vmb was ursach willen das spiel erdacht vnd fuonden sey worden.	VI
Das kuonst keyn feind hat / dann den / der sie nit kan.	VIII
Bedeütung der byldung / vnd eines yden steins im schachbrett / vnd erstlich deß Koenigks.	VIII
Wie die Künigin / wie die Alten / wie die Ritter / wie die Roche / vnd wie die Venden sein soellen.	IX
Warumb das Schachbret quartiert / vnnd wie viel es velder hat.	IX.
Warumb die spangen erhebt seind.	X.
Von dem Thuornn zuo Babylonien.	X.
Warumb etlich veld lere vnd etlich voll seind.	X.
Wie man eyn yden steyn im Schach setzen / ziehen / vnd wie ferr er geen solle / Vnd erstlich von den Künig.	XI.
Wie die Küngin / vnd wie der Alt geen soellen.	XII.
Wie der Ritter / vnd wie das Rach geen soellen.	XIII.
Wie die Venden geen soellen / vnd wie sie künigin werden	14
Von Schach / Mat / vnd was das bedeüt	XIII XV.
Eyn seligk ende bescher vnns Got.

Von form vnd gestalt deß Scachzabel brets / vnd seinen vnderschyden feldernn.

Das Schachbret helt inn yme fierundsechtzigk vnderscheydt oder veldt / Deren das eyn halbteyl schwartz / vnd das ander halbteyl weiß sein solle / vnd ist gestalt wie die nachuolgend figur außwißt.

Von form vnd gestalt / farb vnd namen der bylde oder steyn / damit man im Schach zeücht vnd spielt.

Es seindt zweyerley Bylder oder steyn / damit mann streyt / zeücht / oder spielt im Schachbret. Das eyn teyl ist schwartz / das and’ wyß gefertb. Der schwartzen sein sechtzehen / vnd d wyssen auch 16. vnd werden jre gestalt / form / vnd namen hiernach angezeygt.

Der Koenig seindt zwen eyner schwartz / der ander weyß / also gestalt.		Der Künigin seind zwo / eyn weyß / vnd die ander schwartz / also gestalt.
Der Alten seind fier / vnd seind zwen schwartz / vnd zwen wyß / in der gstalt		Der Ritter seindt fyer / zwen schwartz / vnd zwen weyß / inn der gestalt.
Der Rach seindt fyer / zwey schwartz / vnd zwey weyß / also gestalt.		Der Fendlin seind sechtzehen / acht schwartz / vnd acht weyß / also gestalt.

Wie die Bylde oder stein nach rechter ordenung vnd art diß Spiels in das Schach bret gesta^elt werden so^ellen / Vnd zu^om ersten von den Schwartzen steynen oder bildernn.

DEr Schwartz Künigk soll am ersten gestelt werden auff das weyß feldt / Vnd soll neben jme die Ko^enigin steen vff dem schwartzen veldt / zu^o der rechten seyten. Nach der Ko^enigin soll steen der Alt zu^o der rechten seyten in weyssem velde. Den Alten nach / soll steen der Ritter zu^o der Rechten seyten vff schwartzem velde. Vnd nach den Ritter auff der rechten seyten soll steen das Rach auff weyssem velde an der spangen oder leysten deß Schachtzabel bretts.

Auf der lincken seyten nach dem Ko^enigk soll steen eyn Alter auff schwartzem veld. Nach dem Alten der Ritter auff weyssem velde. Vnd nach dem Ritter soll steen eyn Rach am ende der lincken seyten ann der spangen oder leysten deß Schachtzabel brets.

Von den weissen byldernn oder steyn.

DEr weyß künigk soll zu^o den Ersten gestellt werden auff schwartzes veldt / vnd soll neben jm steen die Künigin auff der rechten seyten / auff weissem veld. Der Alt soll steen nach der Ko^enigin auff schwartzem veld zu^o der rechten seyten. Nach den Alten soll steen zu^o der rechten seiten auff weissem veld der Ritter. Das Rach neben dem Ritter auff schwartzem veld / an der spangen oder leisten am ende der Rechten seytten.

Auff der lincken seyten neben dem weissem Ko^enig sol der Alt steen auff weissem veld. Der Ritter auff schwartzem veld. Das Rach nach dem Ritter auff wyssen veld etc.

Von den Fendlein.

ES sol auch vor dem schwartzen vnd weissen Ko^enigk vnd Ko^enigin / vor den Alten / vor den Ritternn / vnd vor den Rachen / auff allen teylen vnnd seyten vor der ygklichem eyn fendlin verordent / vnd nach seiner farbe gestelt werden / Alles in gestalt nachfolgender figuren.

Nu^on volgt wie eyn jgklicher steyn sein außgangk hatt.

Wie eyn jgklicher Steyn oder Bylde sein außgangk haben solle / Vnd zu^o dem ersten von dem Ko^eenig.

DEr Künigk in seinem ersten außgangk so er zu^o veld zyehen will / mag (ob er will / drey schritt / von dem veld seins außgangs (das ist auff das fierdt veldt) gegen seinen feinden reitten / vnd vff demselben veldt halten pleiben / oder auch auff dem zweyten / oder auff dem dritten / alles nach seinem gefallen vnd gestalt der züge seins wyderteyls / das er keins Schachs besorgen dürffe. Er mag auch zu^o dem selben seinem ersten außgangk eyn fendlin / so in hindert / fürsich stossen vff das nechst veldt / vnd darnach furter nach seiner ordnung gan / Vnd mag gerings vmb sich / auff das ander veldt geen / Vnd mag gerings vmb sich / auff das ander veldt geen / hindersich / fürsich / vnnd nebensich über ort / auff schwartz vnd weyß velder / alles nach seinem willen / gefallen / vnd gelegenheit / Vnd mag auch also nemmen vnd rauben / doch hab er acht auff die Schach.

Von der Königin.

Eyn yegkliche Künigin soll durch die felde jrer farb / über ort / vn nit anderst spacieren mo^egen geen. Vnd so sie auß jrem here (das ist von jrem standt) zu^om ersten mal geen wil / soll sie nit über zwen schridde (das ist über das drit feld) sich herfürher thu^on. Darnach soll sie alweg auff das ander feld gan. Ist sie weiß / so geet sie über eck / vff ein wyß feld: Ist sie schwartz so geet sie über eck auff eyn schwarz veldt.

Von den Alten.

DIe Alten gend vnd springen überzwerch auff das drit feld / also: Welcher Alt auff eynem weissen feld steet / mu^oß dasselbig nit verwandelnn sonder widerumb auff das drit wyß veld geschrenckt über ort schreitten / hindersich / fürsich / nebensich / vnd mag auch also auff alle ort rauben vnd nemmen. Der gestalt soll sich der schwartz Alt auch halten.

Von den Ritternn.

Die streitbarne Ritter mögen alwegen auff das dritt veld gegen den Feinden springen / also / Welcher auff eynem weissen veld gerüst helt / mu^oß über ort auff eynem weissen veld gerüst helt / mu^oß über ort auff eyn schwartz veld sprengen / vnd sich in die selbig ordenu^ong schicken / vnd welcher auff eym schwartzen veldt helt / über ort auff eyn weyß veldt springen.

Von den Rachen.

Die Rach lauffen schnell / vnnd widerstreben allen feinden / sie durchreiten alle velder / wyß vnd schwartz / hindersich / fürsich / nebensich / auff beyden seyten (aber schlecht / vnd nit überort) wo sie frey veldung vmb sich haben / vnd was sie ergreyffen / rauben vnd nemmen sie auch also.

Von den fendelin.

Den nach allen obgenanten steyn oder byldernn / alß den Ko^enigk / der Künigin / Alten / Ritternn / vnd Rachen / Fu^oßknecht (das seind Fendelin) für gestelt werden / soltu wissen / das dieselben Fendelin / so sie zu^o dem ersten außgeen wo^ellen / mo^egen auff das erst oder zweyt feldt schlecht fürsich geen / alle die weyl noch keyn steyn genommen ist. So aber eyner oder mer steyn genommen seind / so mag alß dann keyn fendelin ferrer dann auff das nechst feld / vor jm / geen / außgescheyden die zwey ort fendlin / die vor den Rachen steend / mo^egen zu^o allen zeyten jres ersten außgangs geen auff das zweyt veldt / Vnd mag keyn Vendlin fürsich / sonder mu^oß alweg über ort nemmen oder rauben. Wann auch eyn Fendlin vnuerhindert were von seinem gegenteyl / so mo^echt es alweg auff das nechst veld für vnd für gen / alß lang / biß es zu^o dem ende an die spung kompt. So es die erreicht / so hat es erlangt die freyheyt der Frawen / also / das es darnach widerumb heym geen mag / alß die Ko^enigin über ort / die auch zu^o den ersten auff das dritt feldt / vnd darnach vff das ander oder zeweyt feldt / alles nach jrem willen schreyten mag.

Hie merck eyn gemeyn Regel.

DEm nach der künig / künigin / vnd die Fendlin vor andernn steynen un ersten außgangk ferrer zu^o geen macht haben / Soltu wissen das der selben keins in seinem ersten gefreyten außgangk rauben oder nemmen darff / sonder darnach inn den andernn zügen / nach dem ersten außgangk / das behalt inn gedechtnüß.

Wie sich eyn angeender Leerknabe desß Ritterlichen Schachtzabel Spiels schicken vnd lernen solle / den streyt anzu^oheben / die steyn zu^o ziehen / sein feynden zu^obegegnen / widerfechten / abbrechen / nemmen / vnnd sie fahen solle.

So nu^on der Schwartz vnd Weyß Ko^enigk zu^o streytten vnnd außzu^oziehen bereit seindt / vnd eyner wider den andernn fechten will / alß dann soll der / so am ersten anhebt / sein vngewappet Fu^oß volck (das seindt die Vendlin) wider die streytbarnn Ritter / vnnd die starcken Rach seins gegenteyls / in das Veldt zu^oziehen ordnen / sie reytzen / vnd gegen jnen fechten lassen / vnd inn solcher ordnung / wie nachuolgt / sie anschicken.

Zu^o den Ersten / soltu nach dem Spruch der Alten Schachzyher / alweg den Venden vor der Frawen am ersten ziehen / dann so du das nit thu^ost / mag dich eyn fürsichtiger Schachzieher im dritten oder fierdten zu^ogk matten / Vnnd wirt dieser Fende gemeinlich den ersten zu^og auff das drit feld

fürsich gezogen / wie auch oben gemelt.
Das Fendlin vor deiner Frawen clu^og /
Soltu außziehen im ersten zu^og.

Nach diesem ersten zu^ogk hab acht auff deinen feindt / Vnd zeücht er zu^om ersten seiner Ritter eynen / so verware du dein vorgezogen ersten Fenden/ mit deinen andernn Fenden / so werden alß dann bald drey Fenden auff eyn ander warten.

Die merck / das du denselben dein ersten außgezogen Fenden / nit mit dem Venden der vor dem Künigk steet verwaren solt / laß jn vor dem König steen / vnd zühe eyn andernn zu^o hilff dem ersten.

Nach diesem zu^ogk sehe dich aber wol für / vnnd zeühe der Ort venden eynen der vor dem Rach steet / Vnd nach dem selben zeühe den andernn Venden vor dem Rach auch / so dein Feindt dir dasselb veldt nit verstelt / Vnnd mo^egen die selben ort fenden auff das dritt veldt geen / es sey geraubt oder nit / wiewol etlich sollichs nit zu^olassen wo^ellen.

Darnach zeühe deinen Alten hinder den Venden der bey der Ko^enigin gestanden ist vor das Rach.

Denselben nach / zeühe den andernn Alten auch auff das Veldt darauff er geho^ert vnd geet.

Nach den / mach dein hu^ot auff welche seyt dich dunckt am besten / vnd also / das ye eyn steyn den andernn verwaren mo^ege / Vnd hab sonderlich acht auff welch seyt dein widerteyl sein hu^ot machen wil / das du dein hu^ot auff die ander seyt machest / nach dem gemeynen Sprichwort / Hu^ot gegen hHu^ot / thet nye keyn gu^ot.

So daß also außgericht / alß dann zeühe dein Ritter beyde herfür / vndd laß sie eyn weyl allein Ritterlichen fechten / redlich rauben / vnnd was sie ergreiffen mo^egen / nemmen vnd inn sack stossen.

Auff das sehe dich wol vmb / vnnd wirt es dir müglich / so zeühe die beyde Rach zu^ohauff / hinder die vnuerwarten Fenden. Dann so dieselben Fenden genommen werden oder hinwegk getzogen / so sehen dein Rach von eym ort zu^o dem andernn / vnnd mo^egen leichtlich rauben vnd nemmen.

Du Ju^onger Schachzieher / hab in deinem ziehen alweg auffsehens / das du über eck / oder über ort ziehest / also / So dein gegenteyl / sein hu^ot auff der lincken seytten hatt / vnnd du dein hu^ot auff der rechten seyten hast / so zeühe dein Rach auff der lincken seyten herfu^or / alß bald es sich schicken will / vndd albeyt für vnnd für / über eck / zu^o deines gegenteyls spitzen / ann dem ende seiner u^ot / das du daselbst mo^echst inbrechen / so magstu desto Ritterlicher gesygen vnd das veldt behalten.

Vnnd solt wissen / das nit gro^essers inn diesem Ritterlichen Spiel ist / dan das du die augen nit in seckel legest.

Vnnd sich eben auff.

Hiemit sey diß kleyn anzeygung im Schachbrett zu^o lernen den ju^ongen angeenden Schachtziehernn zu^o eym in gangk vnd bessermm verstandt der nachuolgenden Reymen geendet.

Vnnd volgen hiernach die Gerympten anzeygungen / vnd errichtungen / vnnd lere / desß Hochgelerten Doctor Jacob Mennels / wie er die zu^o Costentz offerbart hatt.

Vnnd zu^om ersten die Vorrede.

Vorred inn Schachzabel.

DIe nateürlich schrifft vnderweyßt vnser menschlich gemüt / so inn steter übung schwebt / vnnd offt beschweyfft ist / sich vnderweylen mit etwas schimpff vnd ku^ortzweyl zu^o ergetzen / auff das die kra^efft / rechter vernu^onfft / dester lenger in wesen beharren / vnd widerumb zu^o ernstlicher handlung geschickt / vnd berait seyend / Lert vnnß auch ergetzlicheit vnd ku^ortzweyl zesu^ochen / nit in den / das vns allein / gelust / ja aber das vnß darbey zenu^otz vnd eer dienen müg. Dann lust on nu^otz vnd eer / hat keynen bestandt. So mit jr beyder hilff loblich vnd bestandtlich ist / dar durch lieb der tu^ogendt gemeret / die laster von vnzimlicher ku^ortzweyl entspru^ongen / gemindert vnd außgerüt werden / das fürwar zu^o letst zu^o viel gu^oten erschießlich ist. Dieweil nu^on die ku^ortzweyl desß hoch berrümbten Schachzabels / von allen weysen lu^ostig / nu^otzlich vnd erlich gescha^etzt ist / angesehen das darinn die klu^ogkheit menschlicher versta^entnüß sich selbs gescherpfft empfind / viel laster verbeüt / groß Hofzu^ocht vnd tu^ogendt gebürt / das aller erbarkeit gema^eß ist. Darumb vorab Gott zu^o lob / vnd allen Adelichen gemüt / so in dieser übertreffenlichen versamlung erscheint / zu^o wolgefallen / hab ich Jacob Menel Doctor / diß gegenwertig gedicht / darinn vrsprung vnd wesen deß Schachtzabels / auch wie mans spielen soll auffs aller kürtzst begriffen. Vnnd wiewol es seiner verborgten bedeütung halb / noch viel mer außlegens vnd ercla^erung bedo^erfft / besonder nach außweysung Vegecij vnd an der in sachen Ritterlich zu^ocht vnd Krieglich art berürend / Hat mich doch nit fru^ochtbar bedeücht / so^ellichs aller mengklich zu^o eroffnen durch die Tru^ockerey / sonder schrifftlich mitzeteylen / wo es nützt. Geben zu^o Costentz / auff den siebenundzwentzigsten tag deß Monadts May. Jn den Jar Tausendt / Fünffhundert vnd Sieben Jar.

Eyns yden gu^otten anfangs recht Fundament ist Gott.

JN welche statt du komest geleich /
So su^och von erst das Himelreich /
     Da mit dir zu^ogeworffen werden
     All ding dort hie auf dieser erden.
Darumb ich Gottes hilff ru^offe an
On die man nichts geschaffen kan /
     Das sie mir helff zu^o denen dingen
     Die mich in huld vnnd gnaden bringen /
Zu^orwerben das mir fru^ochtbar sey /
Gott mach vns aller sorgen frey.
     Auff das hab ich mir fürgenommen /
     Vnd hoff es werd nit übel kommen /
Eyn hüpsch gedicht vom edlen spiel
Deß Schachs / dann es bringt kurtzweil viel.
     Darumb will ich eüch vnderrichten
     In eüwer gemüt gar hoflich flichten
Was yetlich stein bedeüten kan /
Es seyen frauwen oder man /
     Jn welcher maß eyn yeder sey /
     Er schon wol mercken mag darbey
Fürwar gu^ot ku^onst vnd hüpsche leer /
Daruon erzucht / gnad / vnd auch eer
     Erkonnet ymmer dester bas /
     Damit ich in der warheit das
Sprich ich fürwar inn meinem mu^ot
Nit meint das diß Spiel wa^er so gu^ot /
     Alß da ichs selber wolt betrachten
     Der steynen geng vnd jr art achten /
Wie so^elicher Ko^enig vnd Ko^enigin /
Roch / Ritter / Alt / vnd Vendelin /

     Ye eyner bey dem andernn stat /
     Was Hoffzucht yeder an jm hat.

Bey welches Künigks zeyt das Spiel erdacht sey.

Also will ich zu^om ersten sagen
Bey welchem Ko^enigk es kam zetagen.
     Der Künigk was Nabuchodonosors kindt
     Von dem man viel geschrieben vindt /
Der genempt wirt Euilmerodach /
Bey dem erfunden ward der schach.
     Vnß schreibt eyn Lerer Josephus
     Von Euilmerodach alsus /
Das er fürwar viel übels tha^et
Dieweil er noch sein vatter ha^et.
     Darumb er zu^o jm greifft zehand
     Vnd legt jn in deß Kerckers band.
Darnach füget es sich gleich also /
Das gemelter vatter eben do
     Von diesem zeyt eyn ende nam /
     Damit das Reich an Jungen kam.
Er forcht der vatter wider ka^em
Vn jm das erbgu^ot alles na^em.
     Also fand er damals an rat /
     Ho^ert zu^o eyn seltzamliche that /
So verr er wolt das Reich behaben /
Solt er sein vatter außher graben /
     Vnd tha^et dasselbig nit vermeiden /
     Seins vatters leib solt er zerschneiden
Jn dreyhundert stück / vnd die darbey
Dreyhundert Geyren geben frey /
     So mo^echt er nit mer lebendig werden /
     Vnd wer gantz sicher hie auff erden.

Der gmelt Su^on Euilmerodach
Schu^off angends das dem volg beschach.
     Das was fürwar eyn grimme geschicht /
     Die schrifft vns mer von jm vergicht /
Das er kain übel wolt vermeyden /
Darumb er auch kain straff wolt leyden.

Jn welchem Landt das Spil erdacht ist.

     DEr menschen waiß ich etwen viel
     Die wenend das diß edel Spiel
Jm Krieg vor Troy erfunden wer /
Das ist doch gantz vnd gar eyn mer.
     Aber in Chaldea ist das Spiel erdacht /
     Diomedes hats in Greciam bracht.
Do das die andernn Meister sahen
Jn Kriechen / sie zu^osammen jahen /
     Das wer fürwar ain clu^oger syn /
     Vnd übten es vast vnder yn.
Darnach bey Alexanders zeit
Deß Grossen kam es noch mer weit /
     Na^emlich über Egypten Landt /
     Also ward es gantz wol bekandt /
Vnd ist auff das in Teütsch Landt kommen /
Wie jrs yetz schon wolhand vernommen.

Wer das Spiel am Ersten erdicht vnnd fu^onden hat.

     Vor zeit ain grosser Maister waß
     Von clu^ogen sinnen als ich laß
Jn Chaldaischer zu^ongen fand es
Von Orient der hieß Xerses /
     Darzu^o hat er noch einen namen
     Deß er sich zwar auch nit thu^ot schamen /

     Dann Philometer was der nam
     Der jm zu^o eren wol gezam /
Das ist in Teütsch souil geseit
Ein lieber der gerechtigkeit.
     Er gar viel lieber sterben wolt
     Durch gerechtigkeit / dann das er solt
Auß gleißnerei deß Künges huld /
Wann der was ainer so^elchen schuld /
     Auch darzu^o also grüwlich was /
     Das er viel Hoffgesind vmb das
Verderbet / das sie gdorsten jn
Straffen / alß vngestym was sein sin.
     Nu^on erkent man diesen Meister wol
     Das er der tu^ogendt was gar vol /
Vnd baten jn die Leüte do
Das er jn etwas doch also
     Von seiner klu^ogheit wol erda^echt
     Damit er diesen Ko^enigk hin bra^echt
Von vnrat vnd seim bo^esen sitten /
Dardurch viel übels blib vermitten.

Vmb was vrsachen willen diß Spiel erdacht sey.

     Nu^on merckendt auff das auch hie bey
     Was diß Spils Grund vnd Vrsach sey.

Die Erste Vrsach.

     ZVm ersten find ich die vrsach /
     Das obgemelt Emerodach
Der Ko^enig / ward bracht in gu^otte sitt /
So er noturfftige straffe litt /
     Dann es dem Volck in seinem Land
     Was schwer / darzu^o unselbs eyn schand /

Das er der vnzu^ocht souil pflag /
Dem Volck es warlich hart anlag /
     Dann gleich bald vmb eyn cleyne schuld
     Verlor eyn man sein gnad vnd huld /
Das er jm nam sein leib vnd gu^ot /
Also het er eyn dummen mu^ot.
     Darumb das Volck den Meister bat /
     Wie gleich hieuor auch geschrieben stat /
Das er doch jmmer ichts erda^echt
Damit er jn vom übel bra^echt /
     Das er doch senffter würd zu^om teyl /
     Das wer sein nu^otz vnds Volcks heyl.
Also gedacht er hin vnd hin /
Zu^o letst kam jm schnell in den sin
     Das er das Schachspyl also fand /
     Vnd leret es die am Hof zu^ohand
Die Herren daran überal /
Der auch da was eyn mercklich zal /
     Alß an den Küngischen Ho^efen sind
     Hertzogen / Grafen / vnd jre kind /
Freyen / Ritter / vnd auch knecht /
Vnd su^onst leüt von gu^ottem Gschlecht /
     Die lernten alle diß Spiel do /
     Vnd warend so^elcher kurtzweil fro.
Damit vertribends menge stu^ond /
Es du^onckte sie eyn clu^oger fu^ond /
     Vnd gleichnet sich eym rechten streit
     Alß in eym krieg / zu^o beyder seit
Zwen Künig / vnd darzu^o all jr Her
Streittend / yeder an sein wer
     Sich stellet / alß er dann wirdt beschart /
     So ye das spiel gestellet wart /
Vnd es dann an das rauben kam /
Da eyner ye dem andern nam

     Mit raubischem vnd mit kryegischem schall /
     Wie do zemal die Herren all
Dauon empfiengen schimpffes viel.
Vnd da der Künig ersach das Spiel /
     Da ward er in seim hertzen fro /
     Vnd begeret an dem Meister do
Das er jn lert das edel Spiel /
Darumb wo^elt ernn begaben viel.
     Der Meister zu^o dem Künigk sprach /
     Gnädigster Küng Emerodach
Jr mügt das Spiel verfahen nicht /
Ee vorhin das an eüch beschicht /
     Das jr eüch der maß laßt gezemen /
     Eyns jungen tu^ogendt an eüch nemen /
Darnach von stund so mo^egen jr
Nach eüwers hertzen gantz begir
     Wol lernen das eim Küng zu^ozimpt /
     Ob eüwer wirdigkeit vernimpt
Mit tugendt vnd mit senftigkeit /
Was dann man eüch in züchten seit.
     Der Künig sagt das duncket mich
     Gebürlich sein vnd erberlich.
Der Meister antwurt aber do
Dem Künig / vnd sprach / deß bin ich fro /
     Syd jr nu^on wend so gu^otig sein /
     Vnd werden hie der junger mein /
So will ich eüch der bet geweren /
Vnd eüch das Spiel gar treüwlich leren.
     Also do lernnt der Künigk das Spiel /
     Dardurch er von vnsitten viel
Ließ / vnd von seinem grymmen mu^ot
Bracht er sich selbs zu^o eer vnnd gu^ot.
     Nu^on sond jr wissen eben das
     Schon diß der vrsach eyne was.

Die Ander Vrsach.

DJe Ander Vrsach ist auch gu^ot /
Vnd bha^elt den man in gu^oter hu^ot
     Vor müssig gan / das laster gibt /
     So er sein weyl hie mit vertribt.
Deß thu^ot vns gschrifft eyn so^elich gbot /
Vnd spricht / Eyns glebten menschen tot
     Vnd bgrebnüß ist die müssigkeit /
     Darauß entspringt viel üppigkeit /
Die durch das Spiel fürkommen würt /
Darumb es vns gar wol gebürt
     Für andre spiel zenemmen an /
     Dann es ist loblich weib vnd man.

Die Dritt Vrsach.

SO ist auch die Drit vrsach /
Alß Meister Xerses weiter sprach /
     Damit deß menschen hoflicheit /
     Vnd seinr vernu^onfft subteilicheit /
Jn scharpffen fünden würdt geübt /
Vnd wenn er schon vast wer betrübt /
     Von zorn vnd vnmu^ot su^onst entricht /
     So wirt er durch das edel gdicht /
(Wenn ers verstat) zu^o fro^eüden bracht /
Auß rechtem gru^ondt ist es erdacht.

Hie merck eyn sondere Art

diß Spiels / dient darauff / Das thu^onst kein
feyndt hat / dann der sie nit kan.
     Vn ist diß Spiel so rein vnd zart /
     Das es an jm hat so^elich art /
Welcher eyn grobianer ist /
Das er das Spiel zu^o keiner frist

Mag rümen oder sehen zu^o.
Dann er viel lieber morgen fru^o
     Den gantzen tag biß in die nacht
     Auff karten spiel vnnd würffel acht /
Zu^otrincken bringt der sünden viel /
Darumb breyß ich das edel Spiel /
     Das vnns von allen laster nympt /
     Den eren es sich wol gezympt.

Nu^on hebt an die Bildung
vnd bedeütung eynes yeden gesteins auffß aller
kürtzest / vnd erstlich deß Künigs.

AM haupt deß Künges erst fach ich an /
Darauff eyn schone Kron soll stan /
     Die meisterlich gewürcket sey
     Von goldt / da soll man mercken bey /
Gleich alß dasselbig hüpsch metall
Die andernn übertriffet all /
     Also der Künig mit tugend zwar
     Erleüchten soll gantz offenbar /
An jm find ich eyn so^elchen stand /
Das er sol han in rechter hand

     Eyn zepter / ist eyn Künigklich zyr /           

     Da soll man eben mercken schyr
Das er vns allen zu^ogebietten hat
Wie das man thu^ot vnd das man lat /
     Vnd wer dann vngehorsam ist /
     Das er gwalt hat zu^or selben frist
Zu^ostraffen jn an leib vnd gu^ot /
Das er sein reich auch bhalt in hu^ot.
     Darnach vermerck eyn yeder man /
     Der Ko^enigk soll eynen apffel han.

Nach dem der apffel sinwel ist /
Gantz allenthalben / vnzerknist
     Soll er allzeit mit fru^echt vor sein /
     Gleich alß auff erd der sonnen schein.
Darauff will ich eüch weiter sagen /
Der Künig sol zierlich an jm tragen
     Von purpur Künigklich hüpsch gewandt /
     Darbey wir so^ellen sein vermandt
Der züchten all vnd eren groß /
Gott mach vns seiner gnaden gnoß.

Wie die Künigin sein soll.

     Künd ich nu^on Frawen loben wol /
     Alß yeder weyser billich sol /
Vnd sonderlich eyn Künigin /
Das wa^er fürwar der wille min.
     Noch will ich eüch das nit versagen /
     Damit ich bring zu^o disen tagen /

Wie in diesem Spiel eyn Künigin           

Geschaffen vnd bekleydet soll sein.
     Die Künigin fürt eyn so^elchen stat /
     Das sie beym Künigk jrnn sessel hat
Zu^or lincken / sitzendt / auff jr hon
Von edlem gstain eyn güldin kron /
     Zu^o eren hoch ist sie bereit
     Su^onst / wie ich dort vom Künigk hab gseit.

Wie die Alten söllendt sein.

DArnach so nemendt gleich wol war /
Zwen Alt die gho^erendt neben dar /
     Der yeder soll eyn sessel han

     Darauff er sitzt / eyn Bu^och zerthan          

Soll haben / vnd darinnen lesen /
Vor augen han eyn erber wesen.

Wie die Ritter sein söllen.

AVff das will ich die Ritter bstymmen /
Gu^ot roß vnd harnasch thu^ot in zymmen /
     Feür eysen vnd auch aller gwer

     Die kommen jn wol in eym Her /           

Von denen wer noch viel zu^osagen /
So mags die kürtze nit vertragen.

Wie die Roche söllen sein.

DArumb heb ich eyn anders an /
Vnd sag wie yetlich Roch sol stan
     Auff eynem Ritterlichen pferdt /
     Dann es ist aller eren werdt.

Vnd bedeüttet vns eyn Landtuogt schon /           

Der dienen kan Küngklicher kron.

Vonn den Venden
in eyner Summ.

VOr ydem steyn soll dennocht sein
Von menger gstalt eyn Vendelin /
     Damit der gmeyn man werd bedacht /
     Vnd durch sein that zu^o eren bracht.

Dann so^elten Edelleüt geleben           

On handtwercks leüt wer jn nit eben.
     Dann sie seindt gar gu^ot bey den Herren /
     Sie müssends allenhalb erneren.

Warumb das Schachbrett
Quartiert / vnd wie viel es veldung hat.

NVn will ich yetzo heben an
Vom Schachbrett sagen alß ich kan /
     Warumb es Sechtzigk vier Veld hat /
     Wie es hieuor gemalet stat.

Jch find es in den Büchernn ston /
Das nach eyner Statt heyßt Babylon /
     Darinn es anfangs ward erdacht
     Das Schachbrett / gschickt sey / vnd folbracht.
Dieselbig Stat was gar so groß /
Das nymandt bald fand jr genoß.
     Sie was fürwar so hüpsch formiert
     Recht wie das Schachbrett ist quartiert.
Das ich in Büchernn gelesen hab /
An yeder seyt gieng jr nit ab /
     Sechtzehentausendt schritt in gantzer zal /
     Wer die summiert gar überal /
So findt er sechtzigktausent mee.
Die Stat vergieng in alter Ee.
     Nach dieser zal vnd so^elcher acht
     Jst diß Schachbrett hieuor gemacht.

Warumb die Spangen
erhebt seindt.

DArnach so merckend eben das /
So werdt jr ho^eren hie vmb was
     Die spangen am bret erhaben sindt /
     Alß ich es in den büchernn findt /
Vnd ist doch vngla^eüblichen gar /
Das ich es kum gesagen dar /
     Dann sie die mauren bdeüten sol /
     Alß sich eynr weyten Stat zimpt wol.
Darauff hab ich gelesen och /
Das dmuren waren drey meyl hoch /
     Der yede meyl thet tausent schrit /
     Vnd yeder schrit fünff füsse wit.
Eyn so^elche Statt wo^elt ich gernn sehen /
Mo^echt es in dreyen tagen gschehen.

Vom Thurn in der selben stat.

ALß nu^on die schrifft mir weyter gyt /
Babilonia in eyner ebne lyt /
     Vnd ist doch eynem bergk gleich /
     Darauff eyn nebel sta^etigkleich /
Von der ho^eh so die maur nu^on hat /
An eynem ort eyn Thurn auch stat
     Dreyecket / der ist Babil gnant.
     Von dem thu^ot mir die schrifft bekant /
Das er wol an der ho^ehe hab
Siebentausent schritt / da gang nüt ab /
     Das bringt in Welsch Land sieben meyl /
     Damit fürwar gar wenig pfeyl
Vnd gschütz gleich auff das dach mag kommen.
Su^onst hab ich auch darbey vernommen /
     Das menschlich gsicht vmb mittentag /
     Der maur zu^o end nit gsehen mag.
Vnd wiltu dauon wissen mee /
So su^och es in der Alten Ee.

Warumb etliche velder leer vnnd etlich voll seindt.

NVn mo^echtestu nu^on fragen das
Vnd vrsach bgeren hie vmb was
     Das Schachbret also manch veld hat
     Bloß leer / alß das da vollen stat.
Antwu^ort / da soll man mercken bey /
Das diß der recht gru^ondt eben sey /
     Wer Schloß / Stett loblich bauwen wil /
     Bedarff darvor ja Veldes souil /
Das man in gu^otem baw mag han
Damit sich die wol mo^egendt bgon

     Die in denselben Vestnen sind /
     Das ich alß in den Büchernn find:
Dann eynes Küngs namm on eyn Reich
Im vnnütz sey vnd nit geleich.
     Armer Adel on tu^ogends mu^ot /
     Jst zwar zu^o kleynen eren gu^ot.
Viel weger ist eyn armer man
Der glimpff vnd fu^og auch weyßheit kan.
     Wann Adel groß on alle Tu^ogendt /
     Es sey im alter oder ju^ogendt /
Der ist on zweyfel vadt vnwert /
Zu^o schimpff vnd ernst deß nyemandt bgert
     Diß laß ich yetzo alles vallen /
     Von seinem spiel will ich nu^on kallen.

Nu^on volgendt die Figuren
aller obgestympter steyn / vnd wie man im
Schach ziehen soll / vnnd erstlich
von dem Ko^enigk. etc.

ALß mir dann Xerses Carmen seyt /
Diewil eyn künig groß wirde dreit
     Vnd gwalt vff di im rich hat sind /
     Sie seyendt jungk / alt / oder kind /
Darumb so soll er nit verfaren
Von seinem Reich / er soll bewaren
     Sich selbs / vnd die er vndermm hat /
     Darumb er hie in mitten stat.
Er soll nit faren hinfürbas
Denn an das dritt veldt / ho^erend das
     Zu^om ersten mal gleich also gon
     Darby man schon mag wol verston
Er ist ym rych gar wol behu^ot
Damit schafft er ym gu^oten mu^ot /
     Vnd wan er darauß faren soll /
     So zymmet jm der hu^ot gar wol /
Damit er also sicher var /
Sein selbs vnd mengklichs neme war.
     Dann er soll jetzt nit weiter gan
     Wann an das na^echst veld er mag han
Bloß / vnd jm doch da nit ist schach /
Er hat sein gang gleich vor vnd nach
     Zu^o yeden malen nebendt sich /
     Er sol bedencken sicherlich
Wo er allzeyt hin gang vnd far /
Er mu^oß auch achten das er bwar /
     Wan er zu^o seim feindt nit soll gan /
     Denn an das na^echst dir veldt daruan.

Hiernach volgt die Künigin.

DIe Künigin auch zu^om ersten gat
Ab dem veld da sie izt vff stat /
     Auffs dzit Feldt / vnd nit hinfürbas /
     Vnd soll man dabey wissen / das
Sie darnach nit mer anderswo
Hingat denn anß na^echst / du nun war
     Jrmm gangk / tu^ot farb eyn ware meldung
     Die concordiert gantz mit der feldung
Was das nu^on vnns bedeüten kan /
Das sie den ersten sprungk mag han
     Vffs dzit feld / nachmals wyter nicht
     Dann vff das ander / Xerses spricht /
Das frowen anheumsch mügen syn
Jnn besser hu^ot / dann wo sy hyn
     Su^onst kommen oder wo^ellen gon
     Darumbs vßwendig so^ellen hon
Nit also eynen freyen mu^ot /
Denn wyt schwaiff ist zu^o nüte gu^ot /
     Besonder an dem wybschen bild /
     Sie werden dardurch viel zewild /

Darumb ich eüch das lauter meld /
So gar allein ins ander veld
     Mit gu^otem wandel offenbar /
     Man nypt jr züchten eben war



NUn wend wir hiebey auch verlesen
Deß Alten gangk vnd zierlich wesen.
     Der Alt soll gon nu^on wissend das /
     Vber eck inß dzit feld / nit fürbas.
Das ist gesprungen über spitz /
Das bdeüt sein clu^ogheit vnd auch witz /
     Der er sich alweg brauchen sol /
     Wenn die den alten zymmer wol.
Darumb was farb er immer ist /
Da soll er gleich on argen list
     Auff seins gleichen veldung gan /
     Da mag er denn gar sicher stan.
Dann schwarz auff wyß das zymmer nicht /
Auch weiß vnd schwarz sich nit vergleicht.

     Darbey man mer nit mercken kan /
     Dann das eyn Richter schon soll han
Vor augen alle billichkeit /
Jn zieret wol die gerechtigkeit.



EIn Ritter soll sein kün vnd frech
Jn mannlich gmüt / auch bharren kech.
     Da mercken hie was ich eüch meld /
     Wann er stat auff seim rechten veld
Da er zu^om ersten gstellet wart /
So hat er schlyms sein erst außfart /
     Wann er mag nimmer fürbas kommen /
     Dans dritt veld ist jm für genommen.
Vnd wenn er dann an mitten stat /
Wie vns die ler berichtet hat /
     So ist sein außsprungk ytel frey /
     Dann / er / so hat acht veld / hiebey
Man mercken soll gleich recht vnd eben
Das er nit sparen soll sein leben
     Vons heylgen gmeynen nu^otzes willen
     Soll er alß vnrecht helffen stillen.

DAs Rach das mag von statt nit gan /
Also mu^oß es gleich ru^owen stan
Biß das bey jm gerumet wirt /
Vnd es an seim gangk nyemandt jrt.
Vnd wann es dann kompt an die weyt /
So ist es dann in rechter zeyt /
Was stein dann immer vor jm stat
Das es gwalt darüber zerichten hat /
Wie verr oder nach dasselb sey /
Auff das man mercken mag darbey
Den Landuogt der sein gwalt soll füren /
Nit weyter dann sich thu^ot gebüren.
Vnd wenn das Rach im winckel stat /
Alß dann es nummend zwen weg hat /
Bey yeder spang gar durch das brett /
So viel es bloß veld vor jm hett:
Vnd wenn es dann and mitten kumpt /
So sind jm da vier strassen gerumpt /
Zu^or rechten vnd zu^or lincken sit /
Hinder für sich ist kein bit/

Da mag es seinen wandel haben.
Der Landtuogt strafft die bo^esen knaben /
Er blont das gu^ot / vnd strafft das bo^eß /
Vnd macht darauß wenig do^es.

ALs mir der Meister goffnet hatt /
So mag eyn Vend von erster statt
(Im anfangk) an das drit veld gon /
Alß jder so^elichs ist gewon.
Anß dritt veld gond auch alle stein
Zu^om ersten / on das Roch allein /
Als ich hie vor bedeütet hab:
Darnach so gat die freyheit ab
Den Venden das sie nit fürbas
Bekummen thüren / denn an das
Aller na^echst so vor jm ist /
Vermerckend recht on allen list /
Dieweil man handtwercks leüte findt /
So sie in jre heymet sindt /
So ist jr gangk dest sicherer vil.
Noch eyns ich eüch hie sagen wil /

Für das er auß der kuntschafft kumpt
Unsicher ist zu^o aller stundt /
Darumb so soll er nit vor gan /
Wann an das na^echst feld er mag han /
Und für sich über die schlichte /
Das sag ich an diesem dichte.

Wie der Vend eyn
Künigin wirt.

WEnn vor jm so wol ist gerumpt
Das er mit gwalt an dspangen kumpt /
Zu^om gegen teyl / so soll denn sin
Sein gangk als eyner Künigin.
Ab der mag er denn springen wol
Anß dritt feld / wie eyn künigin sol /
Und darnach nymmermer fürbas
Denn an das ander / wissendt das /
Vber die spitz vnd anders nicht /
Alß vns der Meister deß bericht.
Dem Spiel ist alß dem morgen thaw /
Das bas wirt gemerckt durch augen schaw.

Von den Schachen
vnnd Matten.

Man soll auch eyns hie mercken mee /
Alß ich da hab gesprochen ee /
Wie er zu^om ersten so^elle gon /
Findt er zu^o yder seyten ston
Den gegen Küng / er spricht jm schach /
So mu^oß dem selben werden gach /
Das er von stund an das versech /
Das jm nit gleich matt darauff bschech.
Vnd vindt der Vend su^onst eynen steyn /
Er sey recht Roch groß oder kleyn /

#

So nympt er jn gleich über spitz
Darfür hilfft nit deß Alten witz /
Noch nit den Ritter sein künheit /
Was von der Künigin ist geseit
Gu^ots / das kan gehelffen nicht /
Ob auff dem spiel eyn solichs bschicht
Das jm bgegnet das Vendelin
zu^o widermm spitz / so mag das sin
So gwaltig / das es in nimpt /
Der selbig gangk su^onst nit gezimpt:
Wenn so er überwinden sol
Sein widerteyl / dabey man wol
Mercken mag vnd so verstan /
Das jeder handtwercks man mag han
Erlaubung / das er were sich
Nach seim vermügen dapfferlich /
Wer gegen jm hat so^elchen mu^ot
Das er jm will nemmen leyb vnd gu^ot
Als vnß die bücher sagen hie /
Sich zbschirmen / ward verbotten nie /
Wie immer kleyn der vende sey /
So ist er doch so kün vnd frey
Das er dem Küngk spricht schach vnnd mat /
Es so^elchen gwalt auch darzu^o hat /
Das Ritter Rach mag nemmen an /
Und Küngin darbey / man soll verstan
Das arm leüt nyemandt schma^ehen sol /
Man bdarff jr offt vnd dick gar wol.
Dann bdenckendt das man gschriben findt
Das viel zu^o Herren worden sindt /
Die doch nit warnn von hoher art:
Wer tu^ogendt übt vnd die nit spart /
Den soll man gantz für Edel han.
Dann ich vind viel geschriben stan /

Das geystlich / weltlich Herren sind /
Armer redlicher leüten kind.
Darbey soltu auch nit vergessen
Von grossen Steynen das außmessen /
Wenn der ander Küng so stat
Auff so^elchem veld / alß dein Stein hat /
Sein gsicht / vnd gang auffs selbig veld
Welcher steins denn ist / so meld
Jm Schach / so mu^oß er dennen gon:
Mag ers nit thu^on / so mu^oß er ston
Matt / denn er hats Spiel verloren /
Das mügt jn denn / vnd thu^ot jm zoren:
Jst es aber eyn anderer stein /
So nem jn / er sey groß ald klein.

Was die Wort bedeütendt
Schach vnnd Matt.

ZVm letsten merckend auch darbey /
Was Schach vnd Matt gesprochen sey.
Dann wenn eyn Spieler kompt so nach
Dem gegen Künigk / so spricht er schach /
Mit Ritter / Roch / Alt / Künigin /
Oder mit eynem kleynen Vendelin /
Alß ich hieuor geoffnet han /
Da soll man anders nit verstan /
Dann ob er sprech / ich bgeren recht /
So mu^oß er on all fürwort schlecht
Mit seinem Küng von dannen fliehen /
Oder eynen andernn für jn ziehen:
Mag er das nit thu^on vff der statt /
So ist er alß denn Schach vnd Matt.
Die warheit hab ich eüch veriehen /
Das recht soll nymant übersehen

.

Dann wer dasselbig übersicht /
Jst nit eyn wunder ob im gschicht
     Eyn widerdrieß zu^o seiner zeyt /
     Das gwint er dann an seinem streyt.
Aber welcher sich der tu^ogendt fleyßt /
Der wirt von frummen alweg breyßt.
     Damit so end ich diß Gedicht /
     Gott alle ding zu^om besten richt.

Hie endet sich die Under-
weisung / ercla^erung / vnnd außlegung desß ritter-
lichen / khu^onstlichen spiels deß Schachzabels /
Durch den Hochgelerten Doctor Jacob
Mennel etc. auff dem heiligen Reichß
tag zu^o Costentz / Anno etc. 1507.
in Rhymen gedicht / vnd des-
selben spiels vrspru^ong vnd
wesen / Auch wie man
das vff dz aller kürtzst
zu^o zyehen vnd spie-
len begreyffen
mag / offen-
baret.

Vnnd volget dem nach eyn

sondere fleyssige Figur / mit ingetru^ockten Bu^ochstaben deß a b&c. Auß welcher Figuren werstandt vnd hilffe / viel künstlicher / artlicher / geteyltet züg vnd spiel auff dem Schachbrett angezeygt vnd gelernnt werden mo^egen / von andernn scharpffsinnigen schachziehernn in den Truck ( sich dardurch zu^o üben ) mit geteylt vnd überantwu^ort.

Eyn verzeichneter Schachzabel

/ mit etlichen Bu^ochstaben auß dem a b c verordent / Nach welchen bu^ochstaben / alle nachuolgende geteylten Spiel in dem Schachzabelbrett ku^onstlich gezogen / geku^ortzweilt / gespielt / erstritten / vnnd darauß gelernnt werden mo^egen / volgt hier nach getru^ockt.

Nu^on Volgen etlich geordente

künstliche streyt / züg / vnnd spiel / dardurch sich die Schachzieher üben so^ellen das Ritterlich spiel deß schachs desto fürderlicher zu^o lernen vnnd begreiffen.

Wie der Erst Schachzieher
sein Stein vnd spiel stellen solle.

STell den Künig vff ad.
Sein Frawen auff ae.
Ein Fenden auff bf.
Ein Fenden auff bg.
Ein Fenden vff ci.
Ein Rach auff hl.
Ein Rach auff ho.

Wie der widerteyl sein spiel
vnd stein stellen solle.

STell den Künigk auff ei.
Die Frawe auff fk.
Ein Ritter auff d.
Ein Ritter auff e.
Ein Rach auff gi.
Ein Fenden auff go.
Ein Roch auff bi.

Der Künigk vff ad / soll in
sieben zügen Matt werden vom Fenden
der stat auff go.

ZEüch den Ritter auff bc.
Den andernn Ritter auff cd.
Das Rach auff ce.
Den ersten Ritter auff ad.
Den andernn Ritter auff dg.
Die Ko^enigin auff ek.
Den Fenden vff go. den zeühe auff das veld fn.
vnd sprich den Künig Matt.

Stell den Künig auf ch.
Die Künigin auff bf.
Eyn Roch auff be.
Eyn Roch auff bg.

Das Widderteyl.

Eyn Künigk auff fk.
Eyn Fenden auff gl.
Eyn Ritter auff ef.
Eyn Fenden auff eg.
Eyn Alten auff ac.
Eyn Roch auff ag.
Eyn Ritter auff bh.
Eyn Fenden auff el.

Der Künigk vff ch soll Matt
verden am fyerden zu^og / mit dem Fenden
der stat auff gl.

ZEüch den Ritter vom
bh. auff ae.
Das Rach auff dk.
Den Ritter von ef. auff fi.
Nym das Roch mit den Fenden vnd sprich Matt.

Eyn anders.

STell den weissen Künig
auff a.
Den wissen Alten auff ac.

Widerteyl.

DEn schwartzen Künig
stell auff cd.
Das schwartz Rach auff bh.
Das ander schwartz Rach vff bi.
Den schwartzen Alten auff ck.

Der weyß Künigk soll inn
siebenzehen zügen Matt werden auff
dem veld da er stat / vnnd soll der
schwartz alt nit gezogen
werden.

ZEüch das Rach vff b
Den Ko^enigk auff ce.
Das ander Roch auff bc.
Das selb Roch auff fg.
Das Roch auff bd.
Das ander Roch auff fi.
Das ober Roch auff be.
Den Ko^enigk auff ef.
Das ander Rach auff fk:
Das ober Roch auff bi.
Dasselb Rach vff ah.
Das ander Rach auff bf.
Dasselb Roch auff be.
Dasselb vff bd.

Den Ko^enigk ce.
Den Künig auff cd.
Das Roch auff ac. vnd matt.

Den Künig stell auff ag.
Eyn Fenden auff d.

Widerteyl.

Eyn Fenden stell auff e.
Eyn Fenden auff cf.
Eyn Fenden auff cg.
Eyn Fenden auff ch.
Eyn Fenden auff ci.

Die fier Fenden söllen den
Ko^enigk inn zwo^elf zügen Matten
auff af. oder ah.

Züch den Fenden vff bf.
Denselben auff be.
Darnach ruck jne auff ad. so ist er eyn Frawe.
Dieselb frawe auff bd.
Darnach auff cf.
Darnach auff dh.
Darnach auff ek.
Darnach auff dk.
Darnach auff ck.
Den Fenden auff ae.
Dieselb Frawe auff bg.
Die erst Frawe auff bh. vnnd Matt.

STell eyn Künig auff ag.
Eyn Fenden auff de.

Widerteyl.

DEn Künig stell auff ci.
Eyn Roch auff bi.
Eyn Alten auff go.
Eyn Fenden auff ef.

Der Künig auff ag. soll am
siebenzehenden zu^og Matt werden / mit
dem Fenden der stat auff ef.

ZEüch den Alten auff ek.
Das Rach auff bh.
Das Rach auff bg.
Den Ko^enigk auf ch.
Den Ko^enigK auf cg.
Das Rach auff bf.
Das Rach auff be.
Den Ko^enigk auf cf.
Den Ko^enigk auf ce.
Das Rach auff bd.
Den Ko^enigk auf cd.
Den Alten auff cf.
Das Rach auff eg.
Den Ko^enigk auf c.
Den Fenden auff de.
Den Fenden auff cd.
Den Fenden auff bc. vnd Matt.

STell eyn Künig vff ae.
Eyn Fenden auff dl.

Widerteyl.

STell ein Künig vff di.
Eyn Roch auff ch.
Eyn Ritter auff d.
Eyn Frawe auff ce.
Eyn Fraw auff cf.
Eyn Fraw auff df.
Eyn Fraw auff dg.
Eyn Fenden auff em.

Der Künigk auff ae. sol am
fünfften zu^og Mat sein / vnd seind die
fier Fenden fier Frawen /
die bey eyn stend.

ZEüch die Fraw ab df.
auf eh.
Die Frawen ab ce. auff be.
Das Rach auff af.
Das Rach auff bg.
Das Roch auff be. vnd Matt.

Stell eyn Küng auff a.
Eyn Fenden auff dl.

Widderteyl.

Eyn Künig auff ac.
Eyn Ko^enigin auff ag.
Eyn Fenden auff bg.
Eyn Ritter auf dc.
Eyn Fenden auff fh.
Eyn Fenden auff em.
Eyn Rach auff hp.

Der König auff a. soll am
achten zu^og Matt sein mit der Künigin.

ZEüch den ritter vff cf.
Das Rach auff h.
Den Künigk auff be.
Den Künig auff bd.
Das Rach vff d.
Das Rach auff di.
Den Fenden auff af.
Die Künigin auff bg. vnd Matt.

Sich eben auff / dann übersehen
ist auch verspielt.

Nym hien / du angender Schachgyeher / diß ku^ortz vnderrichtung zu^o eym anfangk deines Schachziehens / vnd übe dich fleyßlich darinn / so will ich dir nach dem eyn weitla^eüffigernn bericht / mit vielnn hüpschen geteylten vnd vngeteylten Spielen in Tru^ock geben.

Vnnd sey Gott beuolhen.

Getru^ockt zu^o Oppenheym

Editionsrichtlinien:

• Als Grundlage dienen die Wikisource:Editionsrichtlinien.
• Übergeschriebene Buchstaben werden mit der Vorlage mit <sup> hochgestellt:
  • a o u mit übergeschriebenem e werden a^e o^e u^e
  • u mit übergeschriebenem o wird u^o
• Abkürzungen werden aufgelöst:
  • vñ > vnd
  • etlichē > etlichen
  • od’ > oder
• Die Wiedergabe der Textgestalt folgt dem Original, nicht dem Lautwert.
  • vnd bleibt vnd, wird nicht und
• Worttrennungen am Zeilenende unterbleiben, auch wenn der Bindestrich aus Platzgründen nicht mehr hingepasst hat.
  • er-dacht > erdacht
  • vnderwey sung > vnderweysung

---

Alle redaktionellen Texte dieses Projektes stehen unter der Lizenz CC-BY-SA 2.0 Deutschland